(لا ينصح بقراءته من طرف ذوي الأحكام المسبقة وأصحاب النظرة الضيقة والذين يعانون من الحساسية المفرطة اتجاه الآخرين)
-تقدر تشرح ليا الأخ شنو البرنامج ديالكم ؟
-البرنامج ديالنا هو أن برنامج الخصم ديالنا ما صالحش.
-خلينا دابا من برنامج الخصم ديالكم، عطينا برنامجكم نتوما اللي كاتشوفوه صالح للمغاربة.
-برنامجنا هوا ما يكونش أخنوش رئيس حكومة.
-ولكن هادا ماشي برنامج ؟
-برنامج علاش ماشي برنامج.
-نديروه برنامج أسيدي، ولكن هادا ماشي بيديكم، إلى صوتو الناس على حزبو وجا هوا اللول الدستور كايعطي للملك الحق يختار من هاد الحزب شكون يكون رئيس حكومة.
-ما يمكنش يكون أخنوش رئيس حكومة، هادي غاديا تكون مصيبة كبيرة فالبلاد.
-علاش غادي تكون مصيبة، زعما العثماني هوا اللي ماشي مصيبة ؟
-العثماني ماشي ملياردير.
-ومن بعد؟ الفساد راه كاين عند المزاليط كيما كاين عند الملايرية، وماشي جريمة تكون لاباس عليك وكادير السياسة، الجريمة هيا دخل للسياسة مزلوط وتعود ملايري. وزايدون هاد السيد فلوسو ورثهم على باه اللي كان أول واحد دار بومبة ديال ليصانص وقت الاستعمار.
-حنا حزب يديه نقية.
-ماشي حيت السياسي يديه نقية صافي راه صالح يسير، بعد المرات كايكون المسؤول الغبي والبليد أخطر على البلد من المسؤول اللص، حيت المسؤول الطاهر والبليد كايضيع الدولة فالملايير بالقرارات الغبية ديالو وبعدم القدرة ديالو على حماية المال العام من النهب.
وممكن نتقابحو فكلشي إلا فالأرقام، الفساد زاد فهاد عشر سنين ديال العدالة والتنمية. لذلك كيف خصنا نكونو ضد وصول اللصوص للسياسة خصنا نكونو ضد وصول الأغبياء ليها حتى هوما.
-ما يمكنش يكون أخنوش رئيس حكومة حيت المغاربة قاطعو أفريقيا.
-وفنظرك علاش رجعو يديرو لياصانص فيها ؟ شي حد بزز عليهم يرجعو لأفريقيا ؟
-الله أعلم.
-إلى خدمتي شوية دماغك غادي تلقا أن الناس عاقو بشي حاجة تما ما راكباش، كيفاش شركات كاتبيع المازوط بثمن أعلى بحال طوطال وشال حتى واحد ما دار عليهم حملة المقاطعة. جاو حتى لعند أفريقيا وجاتهم الغيرة على ارتفاع الأسعار. الناس فهمو أن المقصود هوا مول الشركة ماشي الشركة، وفهمو أن القضية فيها تصفية حسابات سياسية ولا علاقة للموضوع بالأسعار، والدليل أن الناس وجعات دير المازوط فمحطات أفريقيا كثر من السابق.
-أخنوش ربح 17 مليار درهم من مورا قرار تحرير الأسعار وما يمكنش المغاربة ينساو هاد الشي.
-أولا هاد الرقم لاحو أول مرة بوانو اللي معاكم فالحزب وكان رئيس لجنة التقصي البرلمانية حول أسعار المحروقات، ثانيا ولمعلوماتك الداودي وزير الحكامة واللي معاكم فالحزب كذب هاد الحكاية ديال 17 مليار درهم وصرح فميدي 1 تيفي بلي هاد الكلام ماشي منطقي وماشي مسؤول، يعني بوانو كذب على المغاربة ملي جاب رقم ولاحو حرفي بلا ما ينشر التقرير اللي جا فيه. والرقم الحقيقي عطاه الداودي وهو رقم قل من 3 مليارات درهم خاضعة للضرائب.
هاد الشي صرح بيه وزير ديالكم، وبوانو ملي سمع أن دعوى قضائية غاديا تهز عليه بتهمة نشر أخبار كاذبة تراجع وسد فمو وما بقاش كايجبد هاد الرقم.
-ما يمكنش يكون أخنوش رئيس حكومة حيت الحزب ديالو نازل بلفلوس فالحملة وشرى لينا المرشحين دياولنا.
-إلى كانو عندكم مرشحين كايتشراو فهادو مع كامل الاحترام راهم حوالى ماشي مرشحين، وإلى عندكم أدلة على هاد الاتهامات وما مشيتوش للقضاء فراكم مشاركين فالجريمة، وإلى عا داويين وما عندكم حتى دليل راكم كاتشوهو فالسمعة ديال الاستحقاق الانتخابي وكاتشوهو حتى بروسكم.
-هاد الشي ماشي غي حنا اللي كانكولوه، حتى الأخ وهبي الأمين العام ديال البام كالو، وفالصحافة الدولية.
كلشي عارف أن هاداك الحزب نهار صاوبو المؤسس ديالو، اللي بالمناسبة كانت عندو الجرأة باش ينزل للميدان فظرفية جد حساسة ويأسس حزب عتق البلاد من خطر الحزب الواحد والقطبية الحزبية، كان الهدف منو يخلق دينامية فالمشهد الحزبي. لكن داك الشي اللي وقع للحزب بعدما خرج منو المؤسس ديالو وطاح فيدين شي شلاهبية مؤسف. وكلشي متافق على أن وهبي ما يمكنش تدي عليه، الصباح كايكول هضرة وفالعشية كايكول هضرة خرى. هاد الحزب خصو من بعد الانتخابات يقلب على أمين عام ما عندوش تضارب المصالح وعندو حس سياسي ديال رجل دولة.
-حنا ما باغينش نرجعو نسيرو الحكومة وقابلين أننا مانكونوش مشاركين فيها ونهبطو للمعارضة، ولكن ما غاديش نقبلو باش يكون أخنوش رئيس حكومة.
-لحسن الحظ ماشي القرار بيديكم، وثانيا نتوما قبلتو بيه معاكم فالحكومة هادي عشر سنين والانجازات ديال القطاعات اللي كان مسؤول عليها حطيتوها كإنجازات حكومية ديالكم، كيما درتو مع الاستثمارات اللي جاب حفيظ العلمي ورديتوها إنجازات ديالكم، علاش جاتكم صعيبة يكون رئيس حكومة ؟
-ما يمكنش. ما يمكنش.
-نتوما خديتو فرصتكم، دوزتو عشر سنين كحلة زحلة على المغاربة علاش ما ياخدش حتى هوا فرصتو واحد خمس سنين، منها نبدلو الكمامر ومنها نجربوه، ومن ميات يوم الأولى غادي يبان العربون، إلى فعلا كان باغي يخدم وفيدو الشغل را غادي تبان النتيجة من العام اللول، ماكان والو حنا أول وحدين غادي نوقفو ضدو، ونتوما فالمعارضة تقدرو طيحوه.
-مغادي يدير والو حنا عارفين مغادي يدير والو.
-ولكن هاد السنوات اللي دوزها فالفلاحة دار شي حاجة لا ؟
-شنو دار ؟
-زعما هاد الخضاري والفاكية اللي كاتشوف فالسواق والزناقي غا رشق ليها وناضت ؟
-ومالو هوا اللي نوضها ؟
-يمكن الواحد يكون حقود ولكن ما يمكنش يكون نكار الخير. سير شوف الفيرمات اللي المغرب ولاو عندو، جميع الفواكه موجودة، لافوكا ولات رخص من البصلة، الأناناص كايتباع بالديطاي فالكرارس، النخل والزيتون تزرع بملايين الأشجار هادي عشر سنين ودابا كايعطي الغلة وعايشين منو الناس. المغاربة اليوم عندهم مياكلو وما يصدرو، واش كايحساب ليك هاد الشي كامل غي جا وتصاوب، راه موراه خدمة ديال سنوات وموراه رؤية ملكية عميقة وبعيدة المدى باش المغرب يكون عندو الاكتفاء الذاتي فالماكلة ديالو.
-تسيير وزارة ماشي هو تسيير حكومة، هاد المنصب خصو رجل سياسي قادر يواجه الناس ويفرض راسو.
-بحال العثماني زعما ؟
-العثماني ماشي معيار.
-وشنو المعيار عندك ؟ بنكيران ؟
-مثلا.
-بنكيران تعطاتو فرصة ولكن خلا على يخدم مشا يقلب على التنوعير الخاوي والمعارك الدونكيشوتية وعجبو الدور ديال المهرج ونسى الدور ديال رجل الدولة. والنهاية راك شفتيها، زاد لعباد الله فالاقتطاع من الرواتب باش يعتق صندوق التقاعد اللي تقبوه هادوك اللي ما قدرش عليهم، وفالأخير حيح باش يضمن لراسو تقاعود ديال سبعة دلمليون فالشهر شدها وكون مع راسو.
-المهم حنا أي واحد قابلين بيه مايكونش غي أخنوش.
-وخا ما يكونش كفاءة ويقدر يدي البلاد للهاوية ؟
-ماسوقناش حنا فالبلاد تمشي للهاوية ولا تكعد، المهم أخنوش لا.
-كانظن المشكل ديالكم مع هاد السيد ماشي مشكل سياسي.
-ومشكل ديالاش ؟
-نفسي.
-كيفاش نفسي ؟
-يعني عندكم عقدة مرضية من جيهتو وخايفينو ينجح فداك الشي اللي فشلتو نتوما فيه، وديك الساعة غادي المغاربة كاملين يعيقو بيكم ويفهو أنهم تصيدو فيكم هاد السنوات كاملين. الحاصول الله يشافيكم والله يدير لهاد لبلاد شي تاويل ديال الخير.
رشيد نيني
